منیم باخیشیمدا بوتون دونیادا
گؤزللر ایچنده تکدی کندیمیز
آنا یوردوم، آتا بابا دییاریم
اوره ییمده کی ایستکدی کندیمیز
داغلاری سویوقدور قانلاری ایستی
بولاقلاری قایناق دومانی توستی
طبیعتی گؤزل چوخ دا توریستی
اورک آچان گول چیچکدی کندیمیز
گونش ساری تئلین سرر گونئیده
چوبان بو سؤزلری اوخویار نئیده
دوغمالار دا کؤچدو گئتدی اؤگئی ده
کؤچمه لردن نه لر چکدی کندیمیز
بیزه یول گؤرسه دیر کئچنلر ایزی
دانناق ـ دانناق ائدیر او ایزلر بیزی
زرغانلی شؤهرت اولدو تبریزی
ایندی اوغولسوزدو تکدی کندیمیز
قبیرلر بَزندی ائولر بوشالدی
گدیکلر باشینی باش بایقوش آلدی
بو سیزقین یئل نه یاتدی نه خوشالدی
تالان اولونموش فدکدی کندیمیز
باش گونئیده جوتی غرق اولموش کرگه
یولا سالیب ائللری جرگه ـ جرگه
گؤردویون دانماسا هر اؤزوم اؤزگه
سوستالمایان قول بیلکدی کندیمیز
داغلاری اوجادی دوزلری ائننی
یئللر لای لاییدیر تورپاغی ننی
اگر تعریف ائتسکده سننی مننی
تعریفه گلمه یه جکدی کندیمیز
کلمات کلیدی:
